Як спараўцы сушаць рыбу ў печы

Сушэнне рыбы – гэта найлепшы спосаб яе прыгатавання з мэтай назапашвання і захавання ад псавання. Рыба, сушаная ў печы, асаблівая – у меру салёная, духмяная, прыгожага залацістага колеру. Гэты спосаб прыгатавання надае рыбе не толькі прыемны водар і смак, але і доўгі час захоўвае яе якасці з найменшай стратай вітамінаў і карысных рэчываў. Адметным вынікам сушкі рыбы такім спосабам з’яўляецца магчымасць есці яе з усімі касцямі.
Зараз спараўцы сушаць рыбу і ў духоўцы газавай пліты, яна атрымліваецца не менш смачнай.
Сушаную ў печы рыбу ўжываюць саму па сабе, а таксама выкарыстоўваюць для прыгатавання квасу (кіслая страва з рыбай і грыбамі), крышаноў (бульбяны суп), вараць з ёю шчаўе, капусту свежую ці кіслую, вараць і тушаць сухую рыбу з бульбай ці асобна тушаць яе ў гаршочку.
Стравы з сухой рыбы гатавалі не толькі паўсядзённа, але і на ўрачыстыя падзеі — вяселлі, хрэсьбіны, памінкі, ужывалі падчас шматлікіх посных дзён, абавязкова – на вячэру на Дзяды.
Да нашага часу сушаная ў печы на саломе рыба застаецца асаблівым ласункам у кожнай спораўскай сям’і, пачастункам і жаданым гасцінцам. А стравы з рыбы на сталах вяскоўцаў займалі і цяпер займаюць адно з галоўных месц нараўне з хлебам. Напэўна, таму ў Спораве многа доўгажыхароў і вялікія дружныя сем’і, а ў спараўцоў добра развітае пачуццё гумару і асаблівая адданасць сваёй вёсцы.

Для сушкі падыходзяць любыя віды рыбы — акунь, карась, ерш, лешч, уюн, плотка, але найбольш смачнымі, салодкімі атрымліваюцца карасі. Рыбу спачатку патрэбна окутаты: почэсаты (вызваліць ад лускі), попороты (выпатрашыць), абавязкова дастаць жабры, памыць у 2-3-х водах.Падрыхтаваную рыбу трэба пасаліць у эмаліраваным посудзе. Солі даць больш, чым пры жарцы. Калі рыбу плануецца захоўваць доўга, то саліць больш, калі плануецца расходаваць хутка, то саліць менш – яна тады смачнейшая. Можна дабавіць прыправы – часнок, кроп, каляндру. Пакінуць на 3-4 гадзіны, каб насольвалася.Пакуль рыба насольваецца, пратапіць печ, звычайна пасля абеду. Рыба атрымліваецца смачнейшай, калі тапіць печ бярозавымі дровамі або дровамі з пладовых дрэў.Калі паленні дагараць і застануцца толькі невялікія вугалькі, трэба хутка, каб не астудзіць печ, выграбсці іх качаргой у пліту.Чарэнь павінна быць чыстай, каб не загарэлася салома, таму попел трэба вымесці з печы змочаным вадой памялом з дубовых ці сасновых галінак.На чарэнь тонкімі радамі палажыць жытнюю салому (калі саломы няма, то сцябло кропу, каляндры, трасніку звычайнага (чаро́ту), камышу азёрнага (сы́тныку), свежыя ці сушаныя галінкі парэчак, маліны, вішні.Рыбу трэба папярэдне пазбавіць ад лішняй вільгаці і солі: працерці чыстай палатнянай анучкай ці прамыць, сцягваючы ваду. Затым роўным пластом пакласці на салому. Паколькі сярэдзіна печы награваецца мацней, то на яе выкладаецца большая рыба, а па баках – меншая.Зачыніць печ засланкай да ранку. Юшку таксама закрыць да канца, але можна пакінуць яе трохі адкрытай на мінут 10-15, каб не так ішоў пах рыбы на хату.На другі дзень ранкам рыбу дастаюць з печы. Яна атрымліваецца ў меру салёная, духмяная, залацістага колеру.Рыба для захоўвання павінна ламацца. Калі рыба не высушылася да канца, то яе дасушваюць на печы ці ў печы. Захоўваюць сушаную рыбу ў сухім месцы – ставяць у карзінах на печы, падвешваюць у палатняных торбах на печы, у кладоўцы, на хаце пад страхою.Вельмі і вельмі смачная гарачая, не да канца высушаная рыба на снеданне і так паесці.

Спосабы і правілы прыгатавання сушанай у печы рыбы і страў на яе аснове запісала Валянціна Міхайлаўна  Лютыч ад карэнных жыхарак вёскі Спорава Ваўчок Вольгі Міхайлаўны (1941 г.н.), Лютыч Вольгі Аляксандраўны (1937 г.н.), Лютыч Марыі Рыгораўны (1912 г.н.), Ліпскай Марыі Міхайлаўны (1951 г.н.), Пашкевіч Надзеі Пракопаўны (1936 г.н.), Равенька Марыі Антонаўны   (1938 г.н.) і інш.
Сакрэтамі прыгатавання сушанай рыбы падзяліліся таксама спараўчанкі Пракурат Марыя Мікалаеўна    (1960 г.н.) і Жуковіч Алена Міхайлаўна (1954 г.н.).

Автор записи: Admin

Добавить комментарий

Ваш адрес email не будет опубликован. Обязательные поля помечены *