Знак у памяць аб народным вучылішчы ў вёсцы Чарнякава

Памятны знак у вёсцы Чарнякава.  2021 г.

Вялікі камень-валун усталяваны ў кастрычніку 2013 года насупраць Свята-Мікалаеўскай царквы побач з тым месцам, дзе яшчэ ў XIX стагоддзі было адкрыта народнае вучылішча. Надпіс на шыльдзе абвяшчае: «150 лет тому назад в Чернякове был открыт первый образовательный местный центр: «…народное штатное училище, в нарочито устроенном доме с 1863 года…». Звесткі гэтыя ўзятыя з царкоўна-прыходскага летапісу Чарнякаўскай царквы, вядомай з 1725 года. А памяць аб першай установе адукацыі ў гэтай мясцовасці ўвекавечана па ініцыятыве ўраджэнца вёскі, вядомага краязнаўцы А. А. Гладышчука і старшыні СВК «Боркаўскі» (цяпер УП «Боркаўскае») М. І. Дземідовіча.

Камень вагой 10 тон ляжаў на беразе меліярацыйнага канала, спатрэбілася тры трактары, каб зрушыць яго і перавезці на новае месца. Быў прымацаваны памятны надпіс, праведзена падсыпка тэрыторыі. Аўтар тэксту – Анатоль Гладышчук, ён жа вырабіў таблічку за ўласныя сродкі. 

Адукацыйны цэнтр уваходзіў у сістэму пачатковай школы    ў Расійскай імперыі, знаходзіўся ў падпарадкаванні Міністэрства народнай асветы і дзейнічаў на падставе зацверджанага  ў 1864 годзе Палажэння аб пачатковых народных вучылішчах. Згодна з Палажэннем уводзіўся адзіны навучальны план, які ўключаў Закон Божы, чытанне царкоўных і грамадзянскіх кніг, лік (чатыры арыфметычныя дзеянні), пісьмо  і царкоўныя спевы.

З’яўленне ў Чарнякаве ачага ведаў паспрыяла далейшаму адкрыццю ў канцы XIX – пачатку XX стагоддзяў школ у шэрагу населеных пунктаў Чарнякаўскай воласці: Горску (1884), Стаўках (1893), Судзілавічах (1895), Ястрабелі (1898), Борках (1903).

Перад Першай сусветнай вайной будынак народнага вучылішча ў Чарнякаве разабралі і перанеслі ў Лясковічы, так як наведвалі яго ў асноўным вучні з гэтай вёскі, таму што ў навакольных вёсках ужо былі свае школы. Адукацыйны цэнтр  у Чарнякаве больш не адрадзіўся.      

Автор записи: Admin

Добавить комментарий

Ваш адрес email не будет опубликован. Обязательные поля помечены *