Васіль Якаўлевіч Сахарчук (1953-2003) — паэт, журналіст, перакладчык, нарадзіўся ў вёсцы Свадзьбічы Бярозаўскага раёна.
Пасля заканчэння Равяціцкай сярэдняй школы адвучыўся на філалагічным факультэце Беларускага дзяржаўнага ўніверсітэта. Чатыры гады настаўнічаў на Любаншчыне і Бярозаўшчыне. З 1979 года працаваў у жабінкаўскай раённай газеце «Сельская праўда». Дэбютаваў вершамі ў 1971 годзе ў зборніку «Універсітэт паэтычны».
Аўтар кніг паэзіі «Зорны мост», «Даніна», «Ранішні госць», «Мой вечны бор», паэтычных перакладаў з балгарскай, англійскай, рускай і ўкраінскай моў, пісаў артыкулы і эсэ.
Для юных чытачоў выдаў кніжку загадак «Што такое? Хто такі?».
Юны дружа! Дзякуючы кніжцы нашага земляка, ты таксама можаш пацешыць сябе і сваіх сяброў цудоўнымі вершаванымі мініяцюрамі, якія напісаў для вас Васіль Сахарчук паводле народных загадак, што бытуюць пераважна на нашай Берасцейшчыне. Гэтая цудоўная кніжачка заўжды чакае цябе на паліцах тваёй бібліятэкі.
